ਤਰਨਤਾਰਨ 14 ਨਵੰਬਰ (ਸੁਖਵਿੰਦਰ ਬਾਵਾ) : TARN TARAN BYPOLL RESULT: ਪੰਜਾਬ ਦੀ ਪੰਥਕ ਸੀਟ ਤਰਨ ਤਾਰਨ ‘ਤੇ ਹੋਈ ਜ਼ਿਮਨੀ ਚੋਣ ਦੀਆਂ ਵੋਟਾਂ ਦੀ ਗਿਣਤੀ ਅੱਜ ਹੋ ਰਹੀ ਹੈ। ਜਿਸ ‘ਚ ਕੁਝ ਘੰਟਿਆਂ ਬਾਅਦ ਹੀ ਸਾਫ਼ ਹੋ ਜਾਵੇਗਾ ਕਿ ਇਸ ਸੀਟ ਤੋਂ ਕੌਣ ਬਾਜ਼ੀ ਮਾਰਦਾ ਹੈ। ਦੱਸ ਦਈਏ ਕਿ ਵਿਧਾਨ ਸਭਾ ਹਲਕਾ ਤਰਨ ਤਾਰਨ ਵਿੱਚ 60.95 ਫ਼ੀਸਦੀ ਦੇ ਕਰੀਬ ਵੋਟਰਾਂ ਨੇ ਆਪਣੀ ਵੋਟ ਦੇ ਹੱਕ ਦਾ ਇਸਤੇਮਾਲ ਕੀਤਾ ਸੀ। ਜ਼ਿਮਨੀ ਚੋਣ ਦੌਰਾਨ ਕੁੱਲ 15 ਉਮੀਦਵਾਰ ਚੋਣ ਮੈਦਾਨ ਵਿੱਚ ਹਨ, ਜਦਕਿ ਈ.ਵੀ.ਐੱਮ ਵਿੱਚ 16 ਨੰਬਰ ਉੱਪਰ ਨੋਟਾ (ਨਨ ਆਫ਼ ਅਬੱਵ) ਐਡ ਕੀਤਾ ਗਿਆ ਹੈ। ਈ.ਵੀ.ਐੱਮ. ਦੀਆਂ ਵੋਟਾਂ ਦੀ ਗਿਣਤੀ ਲਈ 14 ਕਾਊਂਟਰ ਲਗਾਏ ਗਏ ਹਨ ਤੇ ਗਿਣਤੀ ਸਵੇਰੇ 8 ਵਜੇ ਸ਼ੁਰੂ ਹੋਵੇਗੀ ਅਤੇ ਗਿਣਤੀ ਦੇ ਕੁੱਲ 16 ਰਾਊਂਡ ਹੋਣਗੇ।
ਦੂਜੇ ਰਾਊਂਡ ‘ਚ ਸ਼੍ਰੋਮਣੀ ਅਕਾਲੀ ਦਲ ਅੱਗੇ
ਤਰਨ ਤਾਰਨ ਜ਼ਿਮਨੀ ਚੋਣ ਦੇ ਨਤੀਜਿਆਂ ‘ਚ ਦੁਜੇ ਰਾਊਂਡ ‘ਚ ਸ਼੍ਰੋਮਣੀ ਅਕਾਲੀ ਦਲ ਦੇ ਪ੍ਰਿੰਸੀਪਲ ਸੁਖਵਿੰਦਰ ਕੌਰ ਰੰਧਾਵਾ ਨੂੰ ਲੀਡ ਮਿਲੀ ਹੈ। ਜਿਨ੍ਹਾਂ ਨੇ 5843 ਵੋਟਾਂ ਹਾਸਲ ਕੀਤੀ ਹੈ। ਉਹ ਆਮ ਆਦਮੀ ਪਾਰਟੀ ਦੇ ਹਰਮੀਤ ਸਿੰਘ ਸੰਧੂ ਤੋਂ 1480 ਵੋਟਾਂ ਅੱਗੇ ਚੱਲ ਰਹੇ ਹਨ। ਹਰਮੀਤ ਸੰਧੂ ਨੂੰ 4363, ਕਾਂਗਰਸ ਦੇ ਕਰਨਬੀਰ ਸਿੰਘ ਨੂੰ 2955, ਵਾਰਿਸ ਪੰਜਾਬ ਦੇ ਮਨਦੀਪ ਨੂੰ 1889 ਅਤੇ ਭਾਜਪਾ ਦੇ ਹਰਜੀਤ ਸਿੰਘ ਸੰਧੂ ਨੂੰ 435 ਵੋਟਾਂ ਮਿਲੀਆਂ ਹਨ।
ਗਿਣਤੀ ਕੇਂਦਰਾਂ ‘ਤੇ 3-ਪੱਧਰੀ ਸੁਰੱਖਿਆ
ਡਿਪਟੀ ਕਮਿਸ਼ਨਰ ਰਾਹੁਲ ਨੇ ਕਿਹਾ ਕਿ, “222 ਬੂਥਾਂ ‘ਤੇ 60.95% ਪੋਲਿੰਗ ਹੋਈ ਅਤੇ ਅੱਜ 14 ਕਾਊਂਟਰਾਂ ‘ਤੇ 16 ਦੌਰ ਦੀ ਗਿਣਤੀ ਹੋ ਰਹੀ ਹੈ। ਇਸ ਤੋਂ ਇਲਾਵਾ, ਸਾਨੂੰ ETPBMS ਸੇਵਾ ਵੋਟਰਾਂ ਤੋਂ ਡਾਕ ਬੈਲਟ ਅਤੇ ਵਿਸ਼ੇਸ਼ ਤੌਰ ‘ਤੇ ਯੋਗ ਵੋਟਰਾਂ ਦੇ 250 ਤੋਂ ਵੱਧ ਬੈਲਟ ਪ੍ਰਾਪਤ ਹੋਏ ਹਨ… ਨਤੀਜੇ ਦਾ ਸੰਗ੍ਰਹਿ ਦੁਪਹਿਰ 2.30 ਵਜੇ ਤੱਕ ਹੋ ਸਕਦਾ ਹੈ… ਕਿਸੇ ਵੀ ਅਣਸੁਖਾਵੀਂ ਘਟਨਾ ਤੋਂ ਬਚਣ ਲਈ ਗਿਣਤੀ ਕੇਂਦਰਾਂ ‘ਤੇ 3-ਪੱਧਰੀ ਸੁਰੱਖਿਆ ਹੈ, ਜਿਸ ਵਿੱਚ BSF ਅਤੇ ਪੰਜਾਬ ਪੁਲਿਸ ਸ਼ਾਮਲ ਹੈ।”
ਪਹਿਲੇ ਰੁਝਾਨ ‘ਚ ਸ਼੍ਰੋਮਣੀ ਅਕਾਲੀ ਦਲ ਅੱਗੇ
ਤਰਨ ਤਾਰਨ ਜ਼ਿਮਨੀ ਚੋਣ ਦੇ ਨਤੀਜਿਆਂ ‘ਚ ਸ਼ੁਰੂਆਤੀ ਰੁਝਾਨਾਂ ਦੌਰਾਨ ਸ਼੍ਰੋਮਣੀ ਅਕਾਲੀ ਦਲ ਦੇ ਪ੍ਰਿੰਸੀਪਲ ਸੁਖਵਿੰਦਰ ਕੌਰ ਰੰਧਾਵਾ ਨੂੰ ਲੀਡ ਮਿਲੀ ਹੈ। ਜਿਨ੍ਹਾਂ ਨੇ 2910 ਵੋਟਾਂ ਹਾਸਲ ਕੀਤੀ ਹੈ। ਉਹ ਆਮ ਆਦਮੀ ਪਾਰਟੀ ਦੇ ਹਰਮੀਤ ਸਿੰਘ ਸੰਧੂ ਤੋਂ 625 ਵੋਟਾਂ ਅੱਗੇ ਚੱਲ ਰਹੇ ਹਨ। ਹਰਮੀਤ ਸੰਧੂ ਨੂੰ 2285, ਕਾਂਗਰਸ ਦੇ ਕਰਨਬੀਰ ਸਿੰਘ ਨੂੰ 1379, ਵਾਰਿਸ ਪੰਜਾਬ ਦੇ ਮਨਦੀਪ ਨੂੰ 1005 ਅਤੇ ਭਾਜਪਾ ਦੇ ਹਰਜੀਤ ਸਿੰਘ ਸੰਧੂ ਨੂੰ 282 ਵੋਟਾਂ ਮਿਲੀਆਂ ਹਨ।
























