ਜਲੰਧਰ 09 ਸਤੰਬਰ (ਧਰਮਿੰਦਰ ਸੋਂਧੀ) : ਜਲੰਧਰ ਕਮਿਸ਼ਨਰੇਟ ਪੁਲਿਸ ਨੂੰ ਸ਼ਹਿਰ ਵਿੱਚ ਲੁੱਟ-ਖੋਹ ਦੀਆਂ ਵਾਰਦਾਤਾਂ ਨੂੰ ਅੰਜਾਮ ਦੇਣ ਵਾਲੇ ਅਪਰਾਧੀਆਂ ਖ਼ਿਲਾਫ਼ ਵਿੱਢੀ ਮੁਹਿੰਮ ਤਹਿਤ ਇੱਕ ਵੱਡੀ ਸਫ਼ਲਤਾ ਹਾਸਲ ਹੋਈ ਹੈ। ਥਾਣਾ ਡਵੀਜ਼ਨ ਨੰਬਰ 4 ਦੀ ਪੁਲਿਸ ਨੇ ਅਜੀਤ ਨਗਰ ਸਥਿਤ ਗੁਰੂਦੁਆਰਾ ਸਾਹਿਬ ਦੇ ਬਾਹਰ ਲੁੱਟ ਦੀ ਕੋਸ਼ਿਸ਼ ਕਰਨ ਅਤੇ ਗ੍ਰਿਫ਼ਤਾਰੀ ਦੌਰਾਨ ਪੁਲਿਸ ਅਧਿਕਾਰੀ ‘ਤੇ ਜਾਨਲੇਵਾ ਹਮਲਾ ਕਰਨ ਵਾਲੇ ਖ਼ਤਰਨਾਕ ਦੋਸ਼ੀ ਮਾਨਵ ਉਰਫ਼ ਲੋਹਾ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ।
ਕੀ ਸੀ ਪੂਰਾ ਮਾਮਲਾ?
ਗੁਰੂਦੁਆਰਾ ਸ੍ਰੀ ਗੁਰੂ ਸਿੰਘ ਸਭਾ ਸਾਹਿਬ ਅਜੀਤ ਨਗਰ ਦੇ ਮੁੱਖ ਸੇਵਾਦਾਰ ਹਰਜੋਤ ਸਿੰਘ ਲੱਕੀ ਨੇ ਪੁਲਿਸ ਨੂੰ ਦਿੱਤੀ ਸ਼ਿਕਾਇਤ ‘ਚ ਦੱਸਿਆ ਕਿ 1 ਸਤੰਬਰ 2026 ਨੂੰ ਤੜਕੇ ਕਰੀਬ 1:45 ਵਜੇ ਮੋਟਰਸਾਈਕਲ ‘ਤੇ ਸਵਾਰ 2 ਅਣਪਛਾਤੇ ਨੌਜਵਾਨ ਤੇਜ਼ਧਾਰ ਦਾਤਰ ਨਾਲ ਲੈਸ ਹੋ ਕੇ ਗੁਰੂ ਘਰ ਦੇ ਬਾਹਰ ਪਹੁੰਚੇ। ਦੋਸ਼ੀਆਂ ਨੇ ਗੇਟ ‘ਤੇ ਮੌਜੂਦ ਸ. ਮੇਜਰ ਸਿੰਘ ‘ਤੇ ਹਮਲਾ ਕਰਕੇ ਲੁੱਟਣ ਦੀ ਕੋਸ਼ਿਸ਼ ਕੀਤੀ।
ਮਾਮਲੇ ਦੀ ਗੰਭੀਰਤਾ ਨੂੰ ਦੇਖਦੇ ਹੋਏ ASI ਸੰਜੀਵ ਬਾਵਾ ਵੱਲੋਂ 7 ਸਤੰਬਰ ਨੂੰ ਥਾਣਾ ਡਵੀਜ਼ਨ ਨੰਬਰ 4 ਵਿਖੇ BNS ਦੀਆਂ ਸਬੰਧਤ ਧਾਰਾਵਾਂ ਤਹਿਤ ਮੁਕੱਦਮਾ ਨੰਬਰ 117 ਦਰਜ ਕੀਤਾ ਗਿਆ।
ਗ੍ਰਿਫ਼ਤਾਰੀ ਦੌਰਾਨ ਪੁਲਿਸ ‘ਤੇ ਕੀਤਾ ਹਮਲਾ
ਤਫ਼ਤੀਸ਼ ਦੌਰਾਨ ਟੈਕਨੀਕਲ ਸਬੂਤਾਂ ਅਤੇ ਸੂਖਮ ਇੰਟੈਲੀਜੈਂਸ ਦੀ ਮਦਦ ਨਾਲ ਦੋਸ਼ੀ ਦੀ ਪਛਾਣ ਮਾਨਵ ਉਰਫ਼ ਲੋਹਾ (ਵਾਸੀ ਅਲੀ ਮੁਹੱਲਾ, ਜਲੰਧਰ) ਵਜੋਂ ਹੋਈ। ਜਦੋਂ ASI ਸੰਜੀਵ ਬਾਵਾ ਦੀ ਅਗਵਾਈ ਹੇਠ ਪੁਲਿਸ ਟੀਮ ਨੇ ਦੋਸ਼ੀ ਨੂੰ ਫੜਨ ਲਈ ਛਾਪੇਮਾਰੀ ਕੀਤੀ, ਤਾਂ ਦੋਸ਼ੀ ਨੇ ਗ੍ਰਿਫ਼ਤਾਰੀ ਤੋਂ ਬਚਣ ਲਈ ਸਰਕਾਰੀ ਡਿਊਟੀ ‘ਚ ਵਿਘਨ ਪਾਉਂਦਿਆਂ ASI ‘ਤੇ ਹੀ ਜਾਨਲੇਵਾ ਹਮਲਾ ਕਰ ਦਿੱਤਾ।
ਇਸ ਹਮਲੇ ‘ਚ ASI ਦੇ ਹੱਥ ‘ਤੇ ਸੱਟਾਂ ਲੱਗੀਆਂ। ਭੱਜਣ ਦੀ ਕੋਸ਼ਿਸ਼ ਦੌਰਾਨ ਡਿੱਗਣ ਨਾਲ ਦੋਸ਼ੀ ਵੀ ਜ਼ਖ਼ਮੀ ਹੋ ਗਿਆ, ਜਿਸ ਤੋਂ ਬਾਅਦ ਪੁਲਿਸ ਨੇ ਉਸ ਨੂੰ ਮੁਸ਼ੱਕਤ ਨਾਲ ਕਾਬੂ ਕਰ ਲਿਆ। ਸਰਕਾਰੀ ਕਰਮਚਾਰੀ ‘ਤੇ ਹਮਲਾ ਕਰਨ ਦੇ ਦੋਸ਼ ‘ਚ ਉਸ ‘ਤੇ ਵੱਖਰਾ ਮੁਕੱਦਮਾ ਨੰਬਰ 118 ਦਰਜ ਕੀਤਾ ਗਿਆ ਹੈ।
ਅਪਰਾਧਿਕ ਪਿਛੋਕੜ
ਪੁਲਿਸ ਰਿਕਾਰਡ ਮੁਤਾਬਕ ਦੋਸ਼ੀ ਮਾਨਵ ਉਰਫ਼ ਲੋਹਾ ਇੱਕ ਆਦਤਨ ਅਪਰਾਧੀ (ਹਿਸਟਰੀਸ਼ੀਟਰ) ਹੈ, ਜਿਸ ‘ਤੇ ਪਹਿਲਾਂ ਵੀ ਥਾਣਾ ਡਵੀਜ਼ਨ ਨੰਬਰ 4 ਅਤੇ 7 ਵਿੱਚ ਲੁੱਟ-ਖੋਹ, ਕੁੱਟਮਾਰ, ਘਰ ‘ਚ ਵੜ ਕੇ ਹਮਲਾ ਕਰਨ ਵਰਗੇ 4 ਗੰਭੀਰ ਪਰਚੇ ਦਰਜ ਹਨ।
ਪੁਲਿਸ ਕਾਰਵਾਈ:
ਦੋਸ਼ੀ ਕੋਲੋਂ ਇੱਕ ਲੋਹੇ ਦਾ ਚਾਕੂ ਬਰਾਮਦ ਕੀਤਾ ਗਿਆ ਹੈ। ਪੁਲਿਸ ਵੱਲੋਂ ਦੋਸ਼ੀ ਦਾ ਰਿਮਾਂਡ ਹਾਸਲ ਕੀਤਾ ਜਾ ਰਿਹਾ ਹੈ ਤਾਂ ਜੋ ਇਸ ਵਾਰਦਾਤ ‘ਚ ਸ਼ਾਮਲ ਉਸ ਦੇ ਦੂਜੇ ਸਾਥੀ ਅਤੇ ਹੋਰ ਲੁੱਟ-ਖੋਹਾਂ ਬਾਰੇ ਪੁੱਛਗਿੱਛ ਕੀਤੀ ਜਾ ਸਕੇ।
