ਕਾਰਪੋਰੇਸ਼ਨ ਦੇ ਗੈਰ-ਕਾਨੂੰਨੀ ਕਦਮਾਂ ’ਤੇ ਭੜਕੇ ਕੌਂਸਲਰ ਮਨਜੀਤ ਸਿੰਘ ਟੀਟੂ — ਕਮਿਸ਼ਨਰ ਕੋਲ ਪਹੁੰਚੀ ਕੌਂਸਲਰਾਂ ਦੀ ਟੀਮ, ਕਿਹਾ ਜੇ ਜਵਾਬ ਨਾ ਮਿਲਿਆ ਤਾਂ ਜਾਵਾਂਗੇ ਹਾਈਕੋਰਟ

ਜਲੰਧਰ, 28 ਅਕਤੂਬਰ (ਹਰਜਿੰਦਰ ਸਿੰਘ) : ਜਲੰਧਰ ਸ਼ਹਿਰ ਦੀ ਕਾਰਗੁਜ਼ਾਰੀ ’ਤੇ ਸਵਾਲ ਖੜ੍ਹਾ ਕਰਨ ਵਾਲਾ ਇੱਕ ਵੱਡਾ ਮਾਮਲਾ ਅੱਜ ਸਾਹਮਣੇ ਆਇਆ ਹੈ। ਵਾਰਡ ਨੰਬਰ 50 ਦੇ ਕੌਂਸਲਰ ਅਤੇ ਵਿਰੋਧੀ ਧਿਰ ਦੇ ਨੇਤਾ ਸਰਦਾਰ ਮਨਜੀਤ ਸਿੰਘ ਟੀਟੂ ਨੇ ਸ਼ਹਿਰੀ ਨਿਗਮ ਜਲੰਧਰ ਵੱਲੋਂ ਗੈਰ-ਕਾਨੂੰਨੀ ਢੰਗ ਨਾਲ ਹੋ ਰਹੇ ਵਿਕਾਸੀ ਕੰਮਾਂ ’ਤੇ ਤਿੱਖਾ ਵਿਰੋਧ ਜ਼ਾਹਿਰ ਕਰਦੇ ਹੋਏ ਨਿਗਮ ਕਮਿਸ਼ਨਰ ਨਾਲ ਮੁਲਾਕਾਤ ਕਰਕੇ ਆਪਣੀ ਸ਼ੰਕਾ ਦਰਜ ਕਰਵਾਈ ਹੈ।

ਟੀਟੂ ਨੇ ਦੱਸਿਆ ਕਿ ਉਨ੍ਹਾਂ ਦੇ ਹਲਕੇ ਦੇ ਦੋ ਮਹੱਤਵਪੂਰਨ ਕੰਮ —

1️⃣ ਭਗਵਾਨ ਵੀਰ ਬਬਰੀਕ ਚੌਂਕ ਤੋਂ ਭਗਵਾਨ ਵਾਲਮੀਕੀ ਚੌਂਕ ਤੱਕ, ਜਿਸ ਦੀ ਲਾਗਤ ₹81.66 ਲੱਖ ਸੀ, ਅਤੇ

2️⃣ 120 ਫੁੱਟੀ ਰੋਡ ’ਤੇ ਪੈਟਰੋਲ ਪੰਪ ਤੋਂ ਵਾਈਨ ਸ਼ਾਪ ਤੱਕ, ਜਿਸ ਦੀ ਲਾਗਤ ₹89.70 ਲੱਖ ਸੀ,

ਇਹ ਦੋਵੇਂ ਪ੍ਰੋਜੈਕਟ ਹਾਊਸ ਤੋਂ ਪਾਸ ਹੋ ਚੁੱਕੇ ਸਨ, ਪਰ ਬਿਨਾਂ ਕਿਸੇ ਵਾਜਬ ਕਾਰਨ ਦੇ ਕਿਸੇ ਹੋਰ ਇਲਾਕੇ ਵਿੱਚ ਟਰਾਂਸਫਰ ਕਰ ਦਿੱਤੇ ਗਏ ਹਨ।

ਉਨ੍ਹਾਂ ਦਾ ਕਹਿਣਾ ਸੀ ਕਿ ਇਹ ਕੰਮ “ਅਨਅਪਰੂਵਡ ਏਰੀਏ” ਵਿੱਚ ਕਰਵਾਏ ਜਾ ਰਹੇ ਹਨ, ਜੋ ਕਿ ਮੇਅਰ ਦੇ ਹਲਕੇ ਵਿੱਚ ਪੈਂਦਾ ਹੈ ਅਤੇ ਉੱਥੋਂ ਸੜਕ ਵੱਡੇ ਡੰਪ ਸਾਈਟ ਵੱਲ ਜਾਂਦੀ ਹੈ। ਟੀਟੂ ਨੇ ਕਿਹਾ ਕਿ ਬਿਨਾਂ ਹਾਊਸ ਮਨਜ਼ੂਰੀ ਅਤੇ ਪ੍ਰਕਿਰਿਆ ਪੂਰੀ ਕੀਤੇ ਬਿਨਾਂ ਇਸ ਤਰ੍ਹਾਂ ਕੰਮਾਂ ਦੀ ਤਬਦੀਲੀ ਕਰਨਾ ਨਿਯਮਾਂ ਦੀ ਉਲੰਘਣਾ ਹੈ।

ਕ੍ਰਿਸ਼ਨਾ ਮਿਨੀਆਂ ਦੱਸਿਆ ਕਿ ਕਿਸੇ ਵੀ ਸਰਕਾਰੀ ਫੰਡ ਨਾਲ ਹੋਣ ਵਾਲੇ ਕੰਮ ਲਈ ਪਹਿਲਾਂ ਐਸਟਿਮੇਟ ਬਣਦਾ ਹੈ, ਫਿਰ ਟੈਂਡਰ ਜਾਰੀ ਹੁੰਦਾ ਹੈ ਅਤੇ ਫਿਰ ਐਮਪੀ ਜਾਂ ਐਮਐਲਏ ਫੰਡ ਦੀ ਮਨਜ਼ੂਰੀ ਮਿਲਣ ਤੋਂ ਬਾਅਦ ਹੀ ਕੰਮ ਸ਼ੁਰੂ ਕੀਤਾ ਜਾਂਦਾ ਹੈ। ਪਰ ਸ਼ਹਿਰੀ ਨਿਗਮ ਨੇ ਇਹ ਸਾਰੀ ਪ੍ਰਕਿਰਿਆ ਤੋੜ ਕੇ ਆਪਸੀ ਸਾਂਠਗਾਂਠ ਨਾਲ ਕੰਮ ਸ਼ੁਰੂ ਕਰ ਦਿੱਤਾ, ਜੋ ਪੂਰੀ ਤਰ੍ਹਾਂ ਗੈਰ-ਕਾਨੂੰਨੀ ਹੈ।

ਅਜੇ ਬੱਬਲ ਨੇ ਦੋਸ਼ ਲਗਾਇਆ ਕਿ ਉਦਘਾਟਨ ਵੀ ਗਲਤ ਤਰੀਕੇ ਨਾਲ ਕੀਤਾ ਗਿਆ, ਜਿਸ ਬਾਰੇ ਨਾ ਤਾਂ ਕੌਂਸਲਰਾਂ ਨੂੰ ਜਾਣਕਾਰੀ ਦਿੱਤੀ ਗਈ ਅਤੇ ਨਾ ਹੀ ਕਿਸੇ ਹਾਊਸ ਮੀਟਿੰਗ ਵਿੱਚ ਪੇਸ਼ ਕੀਤਾ ਗਿਆ।

ਇਸ ਤੋਂ ਇਲਾਵਾ, ਉਨ੍ਹਾਂ ਨੇ ਸ਼ਹਿਰ ਵਿੱਚ ਚੱਲ ਰਹੀਆਂ ਗੈਰ-ਕਾਨੂੰਨੀ ਟਰਾਲੀਆਂ ਦੇ ਮਾਮਲੇ ’ਤੇ ਵੀ ਕਮਿਸ਼ਨਰ ਕੋਲ ਵਿਰੋਧ ਦਰਜ ਕਰਵਾਇਆ। ਉਨ੍ਹਾਂ ਨੇ ਦੱਸਿਆ ਕਿ ਪੰਜਾਬ ਸਰਕਾਰ ਵੱਲੋਂ 2018 ਵਿੱਚ ਜਾਰੀ ਹੁਕਮਾਂ ਅਨੁਸਾਰ, ਟਰਾਲੀਆਂ ਸਿਰਫ਼ ਕਿਸਾਨੀ ਮਕਸਦਾਂ ਲਈ ਹੀ ਵਰਤੀਆਂ ਜਾ ਸਕਦੀਆਂ ਹਨ, ਨਾ ਕਿ ਸ਼ਹਿਰ ਅੰਦਰ ਕਮਰਸ਼ਲ ਕਾਰਜਾਂ ਲਈ। ਇਸ ਦੇ ਬਾਵਜੂਦ ਇਹ ਟਰਾਲੀਆਂ ਸ਼ਹਿਰ ਵਿੱਚ ਆਮ ਸੜਕਾਂ ’ਤੇ ਚੱਲਦੀਆਂ ਪਈਆਂ ਹਨ, ਜਿਸ ਨਾਲ ਟ੍ਰੈਫਿਕ ਸੁਰੱਖਿਆ ਅਤੇ ਕਾਨੂੰਨ ਦੋਵੇਂ ਦੀ ਉਲੰਘਣਾ ਹੋ ਰਹੀ ਹੈ।

ਦਰਸ਼ਨ ਭਗਤ ਨੇ ਨਿਗਮ ਕਮਿਸ਼ਨਰ ਕੋਲ ਸ਼ੁੱਕਰਵਾਰ ਤੱਕ ਤਸੱਲੀਬਖ਼ਸ਼ ਜਵਾਬ ਦੀ ਮੰਗ ਕੀਤੀ, ਨਹੀਂ ਤਾਂ ਭਾਰਤੀ ਜਨਤਾ ਪਾਰਟੀ ਦੇ ਸਾਰੇ ਕੌਂਸਲਰ ਇਸ ਮਾਮਲੇ ਨੂੰ ਹਾਈਕੋਰਟ ਵਿੱਚ ਲਿਜਾਣਗੇ।

ਉਨ੍ਹਾਂ ਨੇ ਕਿਹਾ —

“ਕਾਰਪੋਰੇਸ਼ਨ ਅੰਦਰ ਚੱਲ ਰਹੀ ਗਲਤ ਪ੍ਰਕਿਰਿਆ ਹੁਣ ਬਰਦਾਸ਼ਤ ਨਹੀਂ ਕੀਤੀ ਜਾਵੇਗੀ। ਜਿਹੜੇ ਵੀ ਅਧਿਕਾਰੀ ਜਾਂ ਵਿਅਕਤੀ ਇਸ ਵਿੱਚ ਸ਼ਾਮਿਲ ਹਨ, ਉਨ੍ਹਾਂ ਖ਼ਿਲਾਫ਼ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇਗੀ।”

ਇਸ ਮੌਕੇ ਉਨ੍ਹਾਂ ਦੇ ਨਾਲ ਅਜੇ ਬੱਬਲ (ਵਾਰਡ ਨੰਬਰ 40), ਕੌਂਸਲਰ ( ਦਰਸ਼ਨ ਲਾਲ ਭਗਤ , ਵਾਰਡ ਨੰਬਰ 52), ਅਤੇ ਕੌਂਸਲਰ ਸ਼ੋਭਾ ਮੀਣਿਆਂ ਦੇ ਬੇਟੇ ਕ੍ਰਿਸ਼ਨਾ ਮੀਣਿਆ ਸਮੇਤ ਕਈ ਕੌਂਸਲਰ ਮੌਜੂਦ ਸਨ। ਸਮੂਹ ਕੌਂਸਲਰਾਂ ਨੇ ਇੱਕ ਸੁਰ ਵਿੱਚ ਕਿਹਾ ਕਿ ਜੇ ਸ਼ਹਿਰ ਵਿੱਚ ਇਸ ਤਰ੍ਹਾਂ ਦੀ ਮਨਮਰਜ਼ੀ ਜਾਰੀ ਰਹੀ, ਤਾਂ ਨਾਗਰਿਕਾਂ ਦੇ ਵਿਕਾਸੀ ਕੰਮ ਹਮੇਸ਼ਾ ਪ੍ਰਭਾਵਿਤ ਰਹਿਣਗੇ-ਜੋ ਲੋਕਾਂ ਨਾਲ ਖੁੱਲ੍ਹਾ ਧੋਖਾ ਹੈ।